Почитувани членови, сметководители и овластени сметководители,

Врз основа на одредбите од Законот за вршење на сметководствени работи („Службен весник на Република Северна Македонија“ бр. 173/2022 и 47/2025), како и актите донесени од органите на Институтот на сметководители и овластени сметководители на Република Северна Македонија (во понатамошниот текст: Институтот), Ве информираме за редовните законски и статутарни обврски кои се од суштинско значење за одржување на професионалниот статус. 

1. ОБВРСКА ЗА ПЛАЌАЊЕ НА ГОДИШНА ЧЛЕНАРИНА

Согласно член 23 став (1) точка 1) од Законот за вршење на сметководствени работи, еден од основните извори на средства за финансирање на работењето на Институтот се годишните членарини од вршителите на сметководствени работи.

Со Одлуката за измена и дополнување на Одлуката за начин на задолжување на членовите на Институтот со чланарина, донесена од Собранието на Институтот на 15.04.2024 година, утврден е краен рок за подмирување на оваа обврска. Согласно член 3 од наведената Одлука: „Се задолжуваат членовите на Институтот на сметководители и овластени сметководители годишната чланарина да ја плаќаат најдоцна до 15-ти ноември за тековната година“.

Со оглед на тоа што крајниот рок за уплата на членарината за 2025 година истекува, ги повикуваме сите членови кои сè уште не ја подмириле оваа обврска, да го сторат тоа, без одлагање.

По однос на заостанатите обврски од изминатите години, Управниот одбор на ИСОС останува кон издадените опомени за плаќање на членарина. Ги повикуваме сите членови кои не ја исполниле оваа обврска спрема Институтот, неодложно да ја исполнат. Во спротивно ќе бидат поведени соодветни постапки за наплата на заостанатите обврски по овој основ.

2. ОБВРСКА ЗА КОНТИНУИРАНО ПРОФЕСИОНАЛНО УСОВРШУВАЊЕ (КПУ)

Согласно член 30 од Законот за вршење на сметководствени работи, сите сметководители и овластени сметководители имаат обврска за постојано стручно усовршување, со цел надградување на теоретските и практичните знаења.

• Сметководителите се должни да посетат обука за КПУ од најмалку 90 часа за период од три години, при што најмалку 24 часа во текот на една година (согласно член 30 став 1).
• Овластените сметководители се должни да посетат обука за КПУ од најмалку 120 часа за период од три години, при што најмалку 32 часа во текот на една година (согласно член 30 став 2).

Третиот циклус на обуки започна на 1 јануари 2025 година (согласно член 64 став 7 од Законот).

Истовремено, Ве известуваме дека согласно член 8 од Законот за изменување и дополнување на Законот за вршење на сметководствени работи („Службен весник на РСМ“ бр. 47/2025), рокот за исполнување на часовите од првиот и вториот циклус (утврден во член 64 став 1 и 2) е продолжен до 31 декември 2026 година, додека рокот за исполнување на часовите од третиот циклус ( утврден во член 64 став 7) е најдоцна до 31 декември 2028 година.

Апелираме редовно да ги следите и посетувате обуките за КПУ со цел навремено исполнување на потребниот фонд на часови.

3. ПОСЛЕДИЦИ ОД НЕПОЧИТУВАЊЕ НА ОБВРСКИТЕ И ДИСЦИПЛИНСКА ПОСТАПКА

Непочитувањето на горенаведените обврски претставува дисциплинска повреда согласно Законот и актите на Институтот и повлекува поведување на дисциплинска постапка пред Дисциплинската комисија на Институтот. Ве известуваме за можните мерки кои се изрекуваат етапно, во случај на непостапување во однос на исполнување на законските предвидените услови:

• I степен – Јавна опомена: Согласно член 38 од Законот, дисциплинска мерка – јавна опомена се изрекува на вршител на сметководствени работи ако:

• Без оправдана причина не ја плати членарината во рок од три месеци по истекот на утврдениот рок за плаќање (член 38, став 1, точка 1 од Законот за вршење сметководствени работи „Службен весник на РСМ“ бр. 173/2022).
• Не ја почитува обврската за континуирано професионално усовршување во согласност со Законот (член 38 став 1, точка 7, изменета во Законот за вршење сметководствени работи во „Службен весник на РСМ“ бр. 47/2025).

• II степен – Парична казна: Согласно член 39 од Законот, доколку се повтори повредата за која претходно била изречена јавна опомена, се изрекува парична казна, односно:

• За повторување на повредата неплаќање членарина во рок од три месеци по истекот на утврдениот рок за плаќање, се изрекува парична казна во висина од 30 % од една просечна месечна нето-плата по вработен во Република Северна Македонија (согласно член 39 став 1 Законот за вршење сметководствени работи „Службен весник на РСМ“ бр. 173/2022).
• За повторување на повредата за непочитување на обврската за КПУ, се изрекува парична казна во висина од една просечна месечна нето-плата по вработен исплатена во Република Северна Македонија (согласно член 39 став (2), измена во Законот за вршење сметководствени работи објавен во „Службен весник на РСМ“ бр. 47/2025).

• III степен – Времено бришење од соодветниот регистар: Согласно член 40 став (1) точка 1) од Законот, дисциплинска мерка – времено бришење од соодветниот регистар во траење до една година се изрекува доколку вршителот на сметководствени работи продолжи да не ја почитува обврската за КПУ и покрај изречената мерка за парична казна.
• IV степен – Бришење од соодветниот регистар и одземање на уверението: Согласно член 41 од Законот, оваа најстрога мерка може да се изрече доколку лицето врши сметководствени работи за времетраењето на мерката времено бришење.

Имајќи го предвид наведеното, ве повикуваме професионалните и законски предвидените обврски редовно да бидат исполнети. Навременото подмирување на членарината и исполнувањето на фондот на часови за КПУ е во интерес на зачувување на професионалниот интегритет и исполнување на обврските предвидени согласно Законот за вршење на сметководствени работи. 

Со почит,                                                                                                                       Скопје, ноември 2025

ИСОС